مزرعة الفراخ 3

بسم الله الرحمن الرحيم

اتكلمنا في الجزئين اللي فاتوا من مشروع مزرعة الفراخ التسمين عن المزرعة  و مواصفاتها و نظم التربية المختلفة و تجهيزات المكان

عايز اتكلم المرة دي عن الكتكوت

في التسمين فيه خطين, خط الفراخ البيضاء, و خط الفراخ الحمراء او الساسو او بلدي المزارع و دي كلها مسميات لنفس الشئ

و هنبتدي اولا بالفراخ البيضاء

و دي انواعها كتير يعني مثلا كب و روص و اربو و غيرها, طيب ايه الفرق بينهم, , الحقيقة ولا حاجة, يعني مثلا يقولك الروص يربي صدرو الكب يربي ورك ولا الاربو يستحمل الحر, بس كل ده فتش, كلهم زي بعض, و الفرق الحقيقي هو في مصدر الكتكوت و هو الشركة صاحبة قطيع الامهات, مثلا عبد السلام حجازي, او الوطنية و غيرهم كتير جدا, بس الحقيقة ان الغش في الموضوع ده كتير, يعني لو بتشتري من سمسار مفيش اي ضامن لو هو جايبلك كتكوت و قاللك ده كتكوت الوطنية انه فعلا بتاع الوطنية, ممكن يجيب اي حاجة من اي حتة و يلبسك

لو شاري من الشركة نفسها, ممكن جدا السواق بتاع عربية الشركة  لو معندوش ضمير يبدل الكتكوت وهو في الطريق مع عربية تانية و ياخد الفرق في جيبه و ييجي ينزلك انت الكتكوت التعبان و انت اللي تلبس

من ضمن المشاكل برضه هو عمر الام, مثلا الام  لو صغيرة بتديلك كتكوت مناعته حلوة بس نموه ابطأ من الكتكوت اللي امه كبيرة, و الام لو عجوزة بتديلك كتكوت حجم و سرعة نمو بس مناعة اضعف

الكتكوت لازم بعد ما يفقس و يتجفف يجيلك على طول بس ساعات بيكون فيه اي مشكلة عند البائع اتسببت ان الكتكوت يبات عنده فيبقى كتكوت بايت, و ده هيجيلك وزنه اتقل حاجة بسيطة بس مشاكله كتييير بعد كدة

و كل اللي فات ده الفيصل فيه هو امانة البائع و سمعته

بس انت عندك شوية حاجات ممكن تعملها, اولا الكتكوت اول لما ييجي بتاخد منه عينة و توزنها, مفروض متوسط الوزن المثالي يكون 43 جرام لو اتقل من كده يبقى غالبا بايت, و لو اخف يبقى غالبا امه فرخة صغيرة 

الحاجة التانية انك تمسك الكتكوت و تقلبه على ضهره, لو قعد يفرك و يتشقلب لحد ما يعدل نفسه ده معناه انه مصحصح, اما لو فضل نايم على ضهره ده معناه انه خامل

تمسك الكتاكيت و تبص على بطنها, لازم تلاقي السرة شكلها متقفل نضيف لو لاقيت اي مشاكل او التهابات شكل اللي في الصورة دي, يبقى اهرب فورا التهاب السرة مشاكله كتير و لو استلمت الكتكوت يبقى حكمت على نفسك بالخسارة

في جميع الاحوال اذا لقيت الكتكوت فيه اي مشاكل من السابقة الذكر اوعى تستلمه لان انت اللي هتشيل الطين بعد كده

الكتكوت الابيض المفروض انه ياكل حوالي 3.5 كيلو علف و يوزن معاك متوسط 1.9-2 كجم , ممكن اكتر و ممكن اقل, و مدة الدورة متوسط 35 يوم

نيجي بقى للفراخ الساسو او بلدي المزارع

هي اتسمت بلدي مزارع علشان هي شكلا لونها زي الفراخ البلدي يعني ابيض و و احمر و اصفر , بس بتبقى وزنها كبير و طبعا البلدي وزنه مش كبير و علشان كده الناس بيسموها بلدي مزارع, انما احنا هنقول عليها ساسو

و دي بتبقى نتاج تركيب ديوك ساسو اصيلة على فراخ داخل فيها عرق بلدي خفيف , و لازمة العرق البلدي هو التلوين علشان كده بيسموها ساسو جيل اول

و دي ينطبق عليها كل اللي قلناه عن الفراخ البيضاء من حيث الحيوية و مشاكل الاستلام, بالنسبة لوزن الكتكوت الحقيقة هو ملوش معدل ثابت زي الفراخ البيضاء لان كل صاحب معمل بيبقى مستوى الفراخ بتاعه غير التاني,, فاحنا هنعتمد على الحيوية و السرة و امانة صاحب المعمل او السمسار

تختلف عن الفراخ البيضاء في مدة التربية اللي بتوصل ل50 يوم و ممكن اكتر, و كمية العليقة خلال الدورة الل بتوصل ل4 كجم او اكتر شوية, و متوسط وزن اقل شوية 1.8 كجم تقريبا

بس تتميز عنها ان مناعتها اقوى شوية من الفراخ البيضاء بسبب عرق البلدي , كمان سعر الكيلو لازم بيكون اغلى من الفراخ البيضاء

انا حابب اعمل جدول مقارنة

	الفراخ البيضاء	الساسو
مدة الدورة	35 يوم	55 يوم
كمية العليقة	3.5 كجم للفرخ	4.25 كجم للفرخ
سعر البيع	اقل	اعلى
المناعة	اقل	اعلى
التسويق	جيد	جيد

بصراحة انا مقدرش اوجهك للفراخ دي او دي و كل حاجة ولها مزايا و عيوب

انا كده قلت اللي عندي تقريبا بخصوص الكتاكيت و انتظروني المرة الجاية ان شاء الله علشان نكمل

لا تبخلوا علي بالدعاء 

روابط مهمة

موضوع سابق مهم جدا لكل واحد بيفكر يعمل مشروع

https://newideadiscuss.blogspot.com/2018/05/blog-post.html

مزرعة الفراخ 1

https://newideadiscuss.blogspot.com/2018/06/blog-post.html

مزرعة الفراخ 2

https://newideadiscuss.blogspot.com/2018/06/2.html

مزرعة الفراخ 2

بسم الله الرحمن الرحيم

نستكمل ما كنا بداناه من الحديث عن مشروع مزرعة الدواجن

ثالثا تجهيزات المكان 

اولا العلافات, و دي لها عدة اشكال بتختلف حسب نظام التربية و عمر الفرخة

بالنسبة للنظام الارضي سواء على نشارة او على سلك بنبدا مع الكتكوت باطباق واسعة ارتفاع جنبها 3سم و دي لحد عمر 10-15 يوم و بعد كده بننزل بالعلافات العادية سواء  صاج او بلاستيك و يفضل بلاستيك لسهولة التنظيف بعد  الدورة و من عيوب العلافات انها بتكون في متناول الفرخ فبيقدر يقف جواها و ينكش العلف برجله و العلف يضيع  على الارض و دي بتكون بمعدل 15-20 علافة لكل 1000 فرخ و فيه نظام علف اوتوماتيك بس مش هنتعرض ليه لارتفاع التكلفة جدا

بالنسبة للبطاريات بيكون فيها درج رفيع بطول العين على ارتفاع منخفض لحد عمر 10-15 يوم و بعد كده بيتفك و بيتركب درج خارجي و بيتظبط ارتفاعه حسب عمر الفرخة و فكرة الادراج دي موفرة للعلف لان من طبيعة الفراخ انها بتحب تنكش و الدرج بيكون بعيد عن الفرخة فبيقل الهادر جدا

ثانيا المساقي, و دي برضه بختلف حسب نظام التربية و عمر الفرخة

بالنسبة للنظام الارضي سواء نشارة او سلك, بنستخدم مساقي يدوية صغيرة لحد عمر 10-15 يوم و بعد كده بننزل بالمساقي الكبيرة سواء كانت يدوية او اوتوماتيكية, لو كانت يدوية فبنضطر نزود العدد كلما زاد عمر الفرخة و بنزود عدد مرات الملو, و مع زيادة العمر بنرفعها على حمالات حديد علشان متبقاش تحت رجلين الفرخ و تلم وساخة و دي  بتكون بمعدل 15-20 مسقاة لكل 1000 فرخ , اما الاوتوماتيكية فبتكون عدد ثابت حوالي 8-10 لكل 1000 فرخ و بتكون متوصلة على خزان بيتملى بموتور مياه

و من عيوبهم ان الفراخ ممكن تخبط في المسقى توقعها و توقع مياه على الارض و تسبب بلل الفرشة و زيادة الامونيا , و في حالة وجود مياه على الارض لازم نشيل الجزء المبلول و نبدله بنشارة نظيفة جافة ده غير الهدر لو كان فيه دواء في المياه

و ممكن يبقى فيه نظام بزابيز للمياه في التربية الارضي و دي بتكون افضل من المسقاة و كمان فيه نظام علف اوتوماتيك   اسمه بان  فيدر و الصورة موضحة نظام  تربية ارضي على فرشة و العلف اوتوماتيك بان فيدر و المياه بزابيز

بالنسبة لنظام البطاريات بتكون بزابيز راكبة في مواسير داخل العين و بيتعدل ارتفاعها حسب عمر الفرخ, و دي طبعا قمة النظافة و مفيش اي تهدير, الا انها بتحتاج نظافة و صيانة من وقت لاخر لان ممكن يتكون طحالب و طين داخل الماسورة و ممكن يسدوا البزابيز

ثالثا الدفايات, و دي بنحتاجلها في الشتاء و ممكن نحتاجها في الصيف في العمر الصغير, و فيه منها عدة انواع

دفايات الكهرباء و دي غير عملية و مكلفة جدا و لا يستعملها احد في المزارع

دفايات الغاز و دي الاكثر انتشارا و فيه منها المتعلق و منها اللي بيقف لى الارض و مفيش فرق بينهم و بتحتاج عدد من الدفايات لتغطية المساحة و ده حسب العمر و درجة الحرارة المطلوبة و طبعا بتشتغل بالانابيب

الهيترات و دي بتشتغل بالسولار و هيتر واحد ممكن يغطي 500 متر

رابعا الشفاطات, و دي لا غنى عنها صيفا او شتاء, في الصيف تهوية و تبريد, اما في الشتاء تهوية فقط, و دي منها مقاسات و قدرات مختلفة, من اول شفاط صغير 100وات مقاس 50سم*50سم لحد 1.4*1.4 مترو بقدرات 2 حصان و 3 فاز,  و الشفاط دايما بيركب في القبلي

رابعا خلايا التبريد و دي بتتركب في شبابيك  الناحية البحرية و بيتقفل بيها الشباك و دي حاجة بنفس فكرة التكييف الصحراوي بتكون الواح من مادة شبيهة بالكرتون و بيتم تجهيز تنك مياه و موتور مياه بيرفع المياه و يضخها في  مواسير فوق الخلايا فالمياه بتنزل على الخلايا و الشفاطات بتكون شغالة من الناحية القبلية تسحب الهواء عبرالخلايا فيتم تبريده و طبعا احنا شايفين الجو بقى ازاي في الصيف, من مشاكل الخلايا انها بتزود الرطوبة و ده بيسبب مشاكل في حالة الارضيات النشارة و هتحتاج تشغل الشفاطات بدون مياه في الخلايا لتقليل الرطوبة, الشفاطات و الخلايا ممكن تشتغل يدوي او بلوحة تحكم بتقيس الحرارة و الامونيا و تشتغل و تفصل اوتوماتيك

انتظروني في المنشور القادم لنستكمل ما بداناه باذن الله

لا تنسوني من صالح دعاؤكم
منشور سابق مهم
https://newideadescuss.blogspot.com/2018/05/blog-post.html

رابط الجزء الاول من المنشور
https://newideadescuss.blogspot.com/2018/06/blog-post.html

مزرعة الفراخ 1

بسم الله الرحمن الرحيم

النهاردة انا عايز اتكلم عن مشروع مهم جدا, مشروع انتاجي بيساهم في اقتصاد البلد بشكل فعال

مشروع تسمين الدواجن

ببساطة انت بتجيب كتكوت عمر يوم و تربيه لحد ما يكبر و بعدين تبيعه لغرض الذبح, بس الموضوع مش بالبساطة دي و هحاول اشرح كل حاجة 
في المنشور ده انا هتكلم عن المكان و نظم التربية و نستكمل في منشور اخر باذن الله

اولا المزرعة 

علشان تبدا تربي هتحتاج مكان للتربية و المكان ده لازم يبقى بعيد شوية عن الناس لان الفراخ لها ريحة مش ظريفة, ولازم يكون جيد التهوية و بنركب شفاطات لضمان التهوية الجيدة و سحب غاز الامونيا, عدد الفراخ بيكون من 8 الى 10 فرخات في المتر المربع و كل ما تكون الدنيا واسعة بيكون افضل
المزارع بوجه عام بتبدا مساحتها من 500متر مربع , يعني بتشيل من 4000 الى 5000 فرخة , وممكن تكون عدة ادوار او دور واحد ,تصميم المزرعة الصح لازم يكون طويل و رفيع يعني ال 500 متر مربع تبقى المقاسات 50*10 و يكون الضلعين الطوال هما المواجهين للبحري و القبلي و الضلعين الصغيرين هما الشرقي و الغربي و التصميم ده مهم جدا لضمان التهوية الجيدة  
ارضية المزرعة لازم تكون مفرودة خرسانة لسهولة التنظيف و التطهير و ضمان عدم دخول اي حيوان للمزرعة عن طريق الحفر في الارض من الخارج و السقف اما خرسانة او على الاقل يكون اسبستوس برضه لسهولة التنظيف و ضمان احكام الغلق
شبابيك المزرعة بتكون بطول الجنب يعني الجنب لو طوله 50متر ده معناه ان بيكون فيه 15 شباك طول الشباك 3 مترلضمان التهوية
مكان المزرعة لازم يكون حواليه متهوي و مينفعش تبقى البيوت لازقة حوالين المزرعة علشان فرصة التهوية, و كمان لان الجيران هتتضايق من الريحة, و ماينفعش يبقى جنبك مزرعة على بعد اقل من 2 كيلولضمان عدم انتقال العدوى
فيه مزارع بتكون معمولة من الساندوتش بانل زي خامة الكرفانات و بتكون عازلة للحرارة بس دي مكلفة و متهيالي محدش بيعملها في مصر

ثانيا نظام التربية

في تربية دواجن التسمين فيه عدة انظمة و هشرحها دلوقت ان شاء الله

اول نظام هو نظام التربية الارضي العادى , بنفرد على الارض نشارة خشب بسمك حوالي 7 سم و بتكون الفراخ سايبة على الارض و بتفضل الفراخ على النشارة من عمر يوم لحد البيع و النظام ده له مزايا و عيوب, الميزة هو انه ارخص نظام انت بتشتري النشارة و دي رخيصة و بتفردها بدون اي تجهيزات و بعد بيع الفراخ بتبيع النشارة دي بعد ما بتكون تشبعت بفضلات الفراخ كسماد لتجار السماد و اسمها الدارج سبلة, اما عيوبها فهي 

اولا سهولة نقل اي عدوى معوية لان الفراخ بطبيعتها بتنقر في الارض و بالتالي لو فرخة عندها اي عدوى معوية بتنزل في الفضلات و ممكن اي فرخة سليمة تنقر في الفضلات فتتعدي بالمرض

ثانيا مع تقدم العمر و زيادة الفضلات في الفرشة بيحصل تفاعل و ده بينتج عنه حاجتين هما الحرارة و الامونيا, و ده بيخليني ابذل مجهود زيادة في التهوية للتخلص منهم, الحرارة لو في الصيف بتعمل احتباس حراري و بتكون قاتلة, و الامونيا بتسبب مشاكل تنفسية و لو زادت برضه بتكون قاتلة

ثالثا ان بعد الدورة ما تخلص و انت بتنضف وارد جدا ان اي ترابة من الفرشة تكون مستخبية في اي شرخ في الحيطة تتسبب في عدوى للدورة اللي بعدها

ثاني نظام هو التربية الارضي بس على ارضيات سلك او بلاستيك مرتفعة عن الارض, و ده بيكون بانك بتبني عواميد طوب بارتفاع 20 سم على الارض  و مسافات 60سم*60سم او على حسب مقاسات قطع الارضيةو بعد كده بتفرد الارضيات السلك اللي بتكون متشالة على العواميد و بالتالي فضلات الفراخ بتنزل على الارض و الفراخ بتكون على السلك النظيف

من مزايا النظام ده هو حالة صحية افضل للفراخ لان الفراخ مش هتنقر في الفضلات و ظروف التهوية هتكون افضل لان مفيش فرشة و تفاعل فضلات و امونيا و حرارة

اما العيوب هي ارتفاع التكلفة عن نظام النشارة بس دي بتكون في الاول بس لانك هتشتري الارضيات السلك او البلاستيك و هتبني العواميد الطوب , كمان صعوبة حركتك في المزرعة لانك بتنقل رجليك على العواميد الطوب, فيه كمان مشكلة انك بتحتاج كل فترة تكسح الفضلات اللي على الارض و ده هيحتاج تجهيز في الارضية من ميول و صرف


ثالث نظام هو التربية في بطاريات و دي بتكون عيون مغلقة مقاسها 1متر*50سم لكل عين مكونة من 3 ادوار بتربي فيها من عمر يوم و حتى عمر البيع
مزاياها 

امكانية زيادة عدد الفراخ في المزرعة لان البطارية 3 ادوار , قلة المشاكل المرضية لعدم وجود فرشة , سهولة رفع الفضلات لانها بتكون في درج تحت كل عين , سهولة الامساك بالفراخ في يوم البيع, 
اما عيوبها فهي ارتفاع التكلفة جدا عن النظامين السابقين, و لكن هي تكلفة لمرة واحدة فقط, و بالنظر لحجم التوفير في المشاكل المرضية فهي هتعوض ثمنها مع الوقت





انتظروني في المنشور القادم لنستكمل ما بداناه باذن الله

لا تنسوني من صالح دعاؤكم

منشور سابق مهم
15 نقطة لازم تحسبلهم كويس قبل اي مشروع
https://newideadescuss.blogspot.com/2018/05/blog-post.html

رابط الجزء الثاني من المنشور
https://newideadescuss.blogspot.com/2018/06/2.html

١٥ معلومة لازم تقراها قبل ما تعمل اي مشروع

السلام عليكم، و كل عام و انتم بخير

انا حابب اقول شوية نصائح للي حابب يعمل مشروع، و دي نصائح انا اكتسبتها من خلال تجربتي الطويلة مع المشاريع

اول حاجة تفكر فيها هي لو المشروع خسر هتقدر تطلع منه سليم ولا بخسارة ، و لو هتخسر يبقى هتخسر كام ٪ و شوف نسبة الخسارة دي انت هتستحملها ولا صعبة عليك

ثاني حاجة تحسبلها ان المشروع لما تعمله لازم تعمله صح الصح، يعني مثلا لو هتعمل محل ملابس للشباب يبقى لازم يكون عندك كل حاجة في المجال ده ،كل الالوان و كل المقاسات ، و دايما عندك الجديد، ، لو ورشة تبريد و تكييف مثلا يبقى لازم  تكون بتعرف في كل حاجة ماينفعش اجيلك علشان الثلاجة تقوللي ماشي و اجيلك للتكييف تقوللي لأ، لو بدأت النشاط صغير غالبا هتقع و مش هتكمل

ثالث حاجة الانطباعية الاولى تدوم، لو العميل جالك و قصرت معاه في حاجة في أول تعامل غالبا مش هتشوفه تاني

رابع حاجة اياك و اياك و اياك من اللي بيقولك هات فلوسك اشغلهالك

خامس حاجة تختار المكان المناسب للنشاط، مثلا لو محل ملابس يبقى لازم تفتح في السوق، يعني كل بلد و فيها الشارع التجاري بتاع الملابس و شارع للادوات الصحية و هكذا، إنما فيه أنشطة تحب تبقى لوحدها مثلا لو سوبر ماركت يبقى هتحتاج تبقى لوحدك بتخدم منطقة

سادس حاجة لازم تفكر بالمقلوب ، ازاي؟, هقولك، انا عايز اكسب كام؟ مثلا ١٠٠٠ جنيه صافي ، هزود عليهم ايجار و عمالة و مرافق مثلا ٥٠٠ يبقى انا محتاج اكسب ١٥٠٠، طيب نسبة الربح كام في نوع التجارة بتاعتي، مثلا المنظفات متوسط ربحيتها ١٥-٢٠٪ يعني انا محتاج ابيع شهريا في حدود ٨٠٠٠ جنيه علشان اكسب ١٥٠٠، لازم ادرس المنطقة و القوة الشرائية فيها هل هبيع بالرقم ده ولا لأ، مثلا اراقب من بعيد لبعيد اي محلات تانية في نفس المنطقة و احاول المح اي علامات تدل على حجم القوة الشرائية بحيث اكون فكرة مبدأية قبل ما اتحرك

سابع حاجة لازم لما تعمل حاجة تكون فاهمها قبل ما تتحرك، يعني مثلا لو ملابس يبقى اعرف انا هجيب بضاعتي منين و احسن الاسعار ، و القطعة المشابهة بتتباع بكام في المنطقة و اوعى تعتمد على فلان صاحبك أو قريبك اللي فاهم كل حاجة و انت زي الباشا، لو نشاط مثلا مطعم يبقى لازم تكون انت صنايعي علشان الصنايعي مايشتغلكش و مايلويش دراعك

ثامن حاجة تحديد حجم رأس المال هيبقى بناءا على كل ما سبق، ايجار المكان المناسب و توضيبه ولوازم النشاط زي الثلاجات أو الارفف و لو لقيت راس المال ما يكفيش يبقى ما تتحركش، و لازم تعمل حسابك أن أي نشاط في الاول بيحتاج وقت ، يعني ماتعتمدش على النشاط وهو لسة في أوله و لازم تبقى عامل حسابك على مصدر تاني لمصاريفك

تاسع حاجة اياك و اياك من القروض الربوية و ابعد في حياتك بشكل عام عن البنوك و الربا قدر الإمكان و مفيش حاجة اسمها بنك اسلامي

عاشر حاجة ما تبصش لحد,فيه ناس لما تركب تاكسي و تدفع ٢٠ جنيه مثلا يقولك التاكسي بيكسب أو يشوف مثلا واحد عنده مزرعة فراخ بقالها كذا سنة يقولك لو بيخسر كان قفلها و بناء على النظرة دي بيتحرك، دي فكرة خاطئة تماما، انت شفت بتاع التاكسي بيقبض ٢٠ جنيه بس ماشفتوش و هو بيدفع ٥٠٠٠ جنيه عمرة موتور أو ٧٠٠٠ جنيه سمكرة و بوية لما العربية اتخبطت منه، و بتاع مزرعة الفراخ ممكن يكون مستمر بسبب أنه شغال بالاجل و مش عارف يوقف لان الدائنين هيطالبوه بالديون إنما طول ماهو شغال بيلبس طاقية ده لده و مش عارف يخلع

النقطة ال١١، أن لازم يكون عندك مراقبة دقيقة لراس المال و حركته و يفضل يكون عندك برنامج تراقب بيه حركة المبيعات و حجم المخزون فيه ناس بتصرف من رأس المال و مش واخدين بالهم ،تراقب معدل نمو النشاط و تكون عامل لنفسك هدف ، و تقف مع نفسك مرة كل ٣ شهور مثلا ، انا كنت ايه و بقيت ايه و متوقع ابقى ايه بعد ٣ شهور، و ادي النشاط مهلة مناسبة حسب نوع النشاط ، اذا ماوصلتش للحجم اللي انت متوقعه يبقى ماتكملش

النقطة ال١٢ قبل اي خطوة لازم صلاة الاستخارة و استشارة كل من تعلم أنه ممكن بيفهم في المجال، و ابعد عن الفتايين و شديدي التفاؤل و المتشائمين

النقطة ال١٣ الابتسامة و المعاملة الكويسة للعميل مهمة جدا جدا، انا شخصيا فيه ناس مابتعاملش معاهم علشان كشريين، و الأمانة و الدقة، اعرف صنايعية بلاط و نقاشين بتاخد منهم مواعيد بعد شهر  محترمين و اسلوبهم محترم و نضاف و مؤدبين و ناس تانية قاعدين على القهاوي مابيشتغلوش قليلي الادب و بيتعاطوا مخدرات و بينصبوا على العميل، و السمعة بتنتشر، و ده ينطبق على كل الأنشطة

النقطة ال١٤ اي نشاط فيه نسبة مخاطرة و لازم يبقى عندك توازن بين المخاطرة و التعقل، و فيه افكار خرافية زي مثلا ادفع ٥٠٠٠ و قسط ٢٠٠ جنيه و امتلك ارض ٢٠٠ متر في مطروح و انت تسرح و تقول لما اخلص القسط هبيعها ب١٠٠ الف ، لا انت غالبا هيتنصب عليك من اللي باعلك أو من العرب اهل المنطقة

النقطة ال١٥ فيه أنشطة بتكون موسمية و ده بيرجع لطبيعة النشاط زي الملابس مثلا  او البلد اللي انت فيها زي اسكندرية أو مطروح موسم الرواج فيها بيكون في الصيف، و بالتالي لازم تكون فاهم ده و عامل حسابك

اكيد فيه قواعد تانية بس ده اللي عندي و اتمنى اكون افدتكم

لا تنسوني من دعائكم بالغيب

عمل جلب اسكاترة سيارة اسبرانزا

بسم الله الرحمن الرحيم

من فترة و انا بعاني من بوش في دركسيون العربية (سبرانزا 516), و بالتدقيق و البحث و التجربة لقيت ان العيب في الجلب اللي بتمسك السكاترة في القنطرة, رحت لحداد حبيبي علشان نعملها و فك الاسكاترة طلعها و دي صورة الجلبطبعا الحالة مهترئة جدا زي ما هو باين










دي الجلبة الحديد الداخلية خلعتها من قلب الكاوتش علشان تتشحط في قلب الجلبة التيفلون الجديدة















دي صورة الاسكاترة بعد خلع الجلب, الجلب بتبقى راكبة في الودان بتاعة الاسكاترة











فيه مشكلة كبيرة و هي ان الجلب دي مش موجودة و بالتالي كان الحل اما اني ادور على جلب بتاعة اي حاجة تنفع تركب عليها او اني اعملها تيفلون فى المخرطة
انا اخترت اني اعملها تيفلون في المخرطة لتوفير وقت البحث لاني ممكن بعد البحث و التعب في الاخر ملاقيش حاجة تنفع ودي كانت نصيحة من صديق ميكانيكي






رحت المخرطة و الخراط اخد مقاسات الجلب بالبوكليس












دي صورة التيفلون على المخرطة, التيفلون ده خامة شبيهة بالبلاستيك بس قوية جدا
بيتعمل منها الواح التقطيع اللي بتستعمل في المطبخ












و دي الجلبة بعد ما اتعملت, طبعا عملت منها جلبتين













و دي الجلبة التيفلون بعد ما شحطنا في قلبها القلب الحديد اللي طلعته من الجلبة الكاوتش القديمة















و دي ودان الاسكاترة بعد ماشحطنا فيها الجلب الجديدة, طبعا كل حاجة لازم تبقى راكبة شحط






الاسكاترة بتبقى مربوطة من ناحية بمسمارين في الودان و من ناحية بافيز و كاوتشة
و ده ينقلنا لمشكلة الكاوتشة







دي صورة الكاوتشة القديمة , طبعا بسبب الجلب البايظة الاسكاترة بتروح يمين وشمال و ده سبب ان الكاوتشة تتهري زي ما انتم شايفين
و دي مشكلة لان الكاوتشة دي مش موجودة جديدة بسهولة و سالت عليها بس مالقيتهاش
و بالتالي كان لازم اوفقلها حاجة

و بعد البحث لقيت الكاوتشة دي
دي كاوتشة ميتسوبيشي لانسر بومة, نفس الشكل بالظبط, بس مقاسها كان اضيق شوية, لما بتركب بتبقى مفتوحة و بالتالي الافيز مش بيركب عليها مرتاح
كان الحل هو ضغط الافيز بشدة و رباط المسامير و هي هتلم فرق المقاس



و بعد كده الحداد اخد الاسكاترة و ركبها في العربية
معرفتش اصور اي صورة من فك او تركيب الاسكاترة لان الموضوع كان صعب جدا بسبب الزنقة
المصاريف
جلبتين تيفلون 80 جنيه
كاوتشة اللانسر 40 جنيه
علبة زيت موبيل 60 جنيه
مصنعية 200 جنيه ( المصنعية دي فيها اكرامية كبيييرة و انا شايف انه المفروض يكون 250-300)
العربية اخدت يومين شغل لان الاسكاترة دي مربوطة في القنطرة من فوق و بالتالي بتحتاج فك اجزاء كتير في العفشة و قواعد الموتور علشان القنطرة تنزل و تعرف توصل للاسكاترة
اتمنى يكون الموضوع مفيد و اني اكون قدرت اوصل المعلومة